30-ǵa jýyq ulttyq mýzyka oryndaýshy Astanany 20 jyldyǵymen quttyqtaý úshin HI «Astana Arqaý» dástúrli túrki mýzykasy festıvaline keldi.
Jyl saıyn ótkiziletin festıvalge aýtentıkalyq mýzykany úzdik oryndaýshylar jınalady, onyń ishinde kishi jáne joıylyp bara jatqan túrki halyqtarynyń ókilderi bar. Osylaısha túrki mýzykalyq mádenıetiniń baı murasyn saqtaý men kóbeıtýge úles qosady.
Eki kún boıy «Astana Opera» teatrynyń Kameralyq zalynda artıster baqsy ánderin, keńirdekpen aıtylatyn ánderdi oryndaıdy, dombyra, homýs jáne t.b. ulttyq aspaptarda oınaıdy. Bıyl festıvalge qazaqstandyq oryndaýshylardan basqa, О́zbekstan, Qyrǵyzstan, Túrkııa, Ázerbaıjan, Tatarstan, Iran, Ýkraına, Qaraqalpaqstan elderiniń mýzykanttary qatysady.
Festıvaldiń ashylýy barysynda teatr foıesinde kúndelikti ómirde kezdese bermeıtin mýzykalyq aspaptardyń úni estilip turdy. Ulttyq kıimder kıgen artıster sahnaǵa shyǵar aldynda óz shyǵarmashylyǵy men óz elderiniń mýzykalyq mádenıeti týraly aıtyp jatty.
Sharaǵa belgili dombyrashy, kompozıtor-kúıshi Shámil Ábiltaev ta qatysty. Onyń shyǵarmashylyǵy dombyra mýzykasyn oryndaýshylardyń birneshe býynynyń arasyndaǵy kópir ispetti. Bıyl kúıshi óziniń 70 jyldyǵyn toılady Mereıtoıynyń qurmetine sahnada aqsaqalǵa elordanyń atynan syı retinde shapan jabyldy.
Qazaq ulttyq óner ýnıversıtetiniń oqytýshysy Aqjýsan Imanǵazyqyzy «Astana Arqaý» festıvaliniń turaqty qatysýshysy. Ol sharanyń ashylýynda Baıjigittiń kúıin oryndady.
- Men «Astana Arqaý» festıvali alańynda jyl saıyn óner kórsetemin. Munda túrki mýzykasynyń úzdik oryndaýshylary jınalady. Tek kórermender ǵana emes, biz – oryndaýshylar da baýyrlas halyqtardyń mazmuny jaǵynan baı, ózindik mýzykasyn tyńdaý múmkindigine ıe bolamyz. Biz tájirıbe almasyp, jańalyqtardy estımiz, osylaısha, mýzykalyq mádenıetimizdi arttyramyz, - deıdi dombyrashy.
Homýsta oınaıtyn Ivanıda Býgýlova Astanaǵa Saha Respýblıkasynan (Iаkýtııa) kelgen, ol ózimen birge ansamblin ala kelmegenine ókinedi.
- Men Astanaǵa birinshi ret kelip turmyn, osyndaı biregeı festıvalge qatysatynyma qýanyshtymyn, onyń ótetini týraly qurbymnan bildim. Ol «Astana Arkaý» festıvaline birneshe ret qatysqan. Men homýsta jáne kúpsirde oınaımyn – bul baraban jáne halyq ánin aıtamyn. Jalpy, bizdiń ansamblimiz bar, bul joly jalǵyz kelgenim ókinishti. Kelesi joly ansamblmen tolyq quramda kelemiz dep oılaımyn, - deıdi ıakýtııalyq qonaq.
Eske salaıyq, festıval búgin «Astana Opera» teatrynda konsertpen aıaqtalady. Bastalýy saǵat 19.00-de, kirý tegin.